ಬಂದೇ ಬರುವುವು

ಬಂದೇ ಬರುವುವು ಬಂಗಾರದ
ಹೊಂಗಿರಣದ ನಾಳೆಗಳು
ಬಣ್ಣ ಬಣ್ಣದಾ ಬದುಕನು ಬರೆಯಲು
ತೆರೆದಿವೆ ಹಾಳೆಗಳು

ಎಲ್ಲೆಲ್ಲೂ ಹೊಗೆಯಾಡಿದೆ ನೋವೇ
ಅಳುಕದಿರಲಿ ಮನವು
ಕಲಕದೆ ಬಾಳು ತಿಳಿವುದೆ ಹೇಳು
ಜಗದ ದುಃಖ ನೋವು?

ನಾಳೆಯ ಬಾಳಿನ ಸವಿಯನು ಕನಸದ
ಜೀವವಿಲ್ಲ ಜಗದಿ;
ಆಸೆಯ ಅಮೃತದ ಸಿಂಚನವಾಗಲು
ಆಗದೆ ಕೆರೆ ಅಂಬುಧಿ?

ಬಂದೇ ಬರಲಿವೆ ನಾಳೆಗಳು
ಬೆಳಕಿನ ತಾರೆಗಳು
ಬಂದೇ ಬರಲಿವೆ ನಾಳೆಗಳು
ಹೊನ್ನಿನ ತೀರಗಳು

                                                      
                                                           -  ಡಾll ಎನ್. ಎಸ್. ಲಕ್ಷ್ಮೀ ನಾರಾಯಣ ಭಟ್ಟ