ನಗೆದೀಪ ಕಣ್ಣಲಿರಿಸು

ನಗೆದೀಪ ಕಣ್ಣಲಿರಿಸು ಗೆಳೆಯ ನೀ

ನಗೆದೀಪ ಕಣ್ಣಲಿರಿಸು

ಮುರಿದ ಕನಸನು ಗುಡಿಸಿ

ಮನದ ಮೂಲೆಗೆ ಸರಿಸಿ

ಹೊಸಮಿಂಚು ಎದೆಗೆ ಕರೆಸು - ತಪ್ಪದೇ

ಹಳೆ ಕಹಿಯ ಉರಿಗೆ ಸಲಿಸು

ಆಸೆ ಫಲಿಸಲಿ ಎಂದು

ಆತುರದಿ ಹಾಯದಿರು

ಕಾಯುವುದ ಮನಕೆ ಕಲಿಸು - ಏನನೂ

ಕಾದು ಪಡೆಯುವುದೆ ಸೊಗಸು

ಹೊಸ ಹಾದಿಗಳ ಅರಸು

ಹೊಸ ಶಿಖರಗಳ ಜಯಿಸು

ಎದೆನೋವ ನಕ್ಕು ಮರೆಸು - ಎಂದಿಗೂ

ಹಸನಾಗಿ ಇರಲಿ ಮನಸು

                                                                  - ಡಾII ಎನ್. ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಕಾಗದದ ದೋಣಿಗಳು

ಕಾಗದದ ದೋಣಿಗಳು ತೇಲಿದರು ಏನಂತೆ

ಮಿನುಗದೇ ಮರಿ ಬೆಳಕು ಮಡಿಲಿನಲ್ಲಿ?

ತೆವಳಿದರು ಏನಂತೆ ಕಾಲು ಇಲ್ಲದ ಗಾಳಿ

ಚೆಲ್ಲದೇ ಕಂಪನ್ನು ದಾರಿಯಲ್ಲಿ?

ನಾರುತಿಹ ಗೊಬ್ಬರವು ಜೀವರಸವಾಗಿ

ಊರದೇ ಪರಿಮಳವ ಮಲ್ಲಿಗೆಯಲಿ?

ತಿಂದೆಸೆದ ಓಟೆಯೂ ಮರವಾಗಿ ಹರವಾಗಿ

ವರವಾಗದೇ ಹೇಳು ಹಣ್ಣಿನಲ್ಲಿ?

ಉಪ್ಪಾದರೂ ಕಡಲು ನೀರ ಒಡಲಲ್ಲಿಟ್ಟು

ಸೀನೀರ ಮೋಡಗಳ ತಾರದೇನು?

ಸಾಗರಕೆ ಬಿದ್ದ ಜಲ ಕೂಡಿಟ್ಟ ಅನ್ನ ಬಲ

ಕಾಯುವುದು ಸಮಯದಲಿ ಲೋಕವನ್ನು

ಒಂದೊಂದು ವಸ್ತುವಿಗೂ ಒಂದೊಂದು ಮಾಯೆ

ಒಂದೊಂದಕೂ ಸ್ವಂತ ಧಾಟಿ ನಡಿಗೆ

ಹಗುರಾದ ಬಾಳಿಗೂ ಹಿರಿದಾದ ಧ್ಯೇಯವಿದೆ

ನಗೆಗೀಡು ಏನಿಲ್ಲ ಸೃಷ್ಟಿಯೊಳಗೆ

                                                             - ಡಾII ಎನ್. ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಎಂದೂ ಕಾಣದಂಥ ಕನಸು

ಎಂದೂ ಕಾಣದಂಥ ಕನಸು

ಬಂದು ಮನವ ತಾಗಿತು

ಬಂದ ಗಳಿಗೆ ಎಂತೊ ಏನೊ

ಅಲ್ಲೆ ಮನೆಯ ಹೂಡಿತು

ನಿಂತ ಕಡೆಯೆ ಬೇರನೂರಿ

ಆಳ ಅಗಲ ಹರಡಿತು

ಧಗೆ ತುಂಬಿದ ನೆಲದ ಎದೆಗೆ

ಹಸಿರು ಮಾತ ಉಸುರಿತು

ತೀರುತಿರುವ ಹರುಷದಂತೆ

ಆರುತಿರುವ ದೀಪವು

ಮೀರಿ ಉರಿದು ಕೊರಗು ಹರಿದು

ಕೊನೆಯಾಯಿತು ಶಾಪವು

ಜೀವ ಭಾವ ಕಾವು ನಿಂತು

ಬೆರಗು ಮುಳ್ಳು ಕಲ್ಲಿಗೂ

ಕವಿತೆ ಬೆಳೆದ ಕಂಪು ಬಂತು

ಅಲ್ಲಿ ಇಲ್ಲಿ ಎಲ್ಲಿಗೂ

                                                         - ಡಾII ಎನ್. ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಹೊಸ ವರ್ಷ ಹೊಸ ಹರ್ಷ ತರಲಿ.. :)

ಹಾಡುವ ಹಕ್ಕಿಗೆ ಹೂವಿನ ರೆಂಬೆ

ಹಾಡುವ ಹಕ್ಕಿಗೆ ಹೂವಿನ ರೆಂಬೆ

ಕಂದನ ಕೈಗೆ ಬಣ್ಣದ ಗೊಂಬೆ

ಆಶೀರ್ವದಿಸಲಿ ಈ ಹೊಸ ವರ್ಷ

ಪ್ರಾಯದ ಗಂಡಿಗೆ ಪ್ರೀತಿಯ ರಂಭೆ

ಖಾಲಿ ಆಗಸಕೆ ಕಪ್ಪನೆ ಮೋಡ

ಬೆಂದ ಜೀವಕೆ ಬೆಚ್ಚನೆ ಗೂಡ

ಬಾಗಿನ ನೀಡಲಿ ಈ ಹೊಸ ವರ್ಷ

ಕವಿ ಕಲ್ಪನೆಗೆ ಹೊಸ ಹೊಸ ಹಾಡ

ನಲ್ಲಿಯ ಬಾಯಿಗೆ ನಿಲ್ಲದ ನೀರು

ಹೊತ್ತು ಹೊತ್ತಿಗೆ ತಪ್ಪದೆ ಹಾಲು

ಸಿಗುವಂತಾಗಲಿ ಈ ಹೊಸ ವರ್ಷ

ಬಡವರಿಗೂ ಮೈ ತುಂಬಾ ನೂಲು

ಬಿರಿದ ಭೂಮಿಗೆ ಸುರಿಯುವ ಧಾರೆ

ಮಿರಿ ಮಿರಿ ಮಿಂಚಿನ ಗದ್ದೆಯ ಮೋರೆ

ತರುವಂತಾಗಲಿ ಈ ಹೊಸ ವರ್ಷ

ಮೆರೆಯಲಿ ನಾಡಿನ ಭಾಗ್ಯದ ತಾರೆ

                                                          - ಡಾ ಎನ್. ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಹೊಸವರ್ಷ ಬಂದಂತೆ ಯಾರು ಬಂದಾರು?

ಹೊಸವರ್ಷ ಬಂದಂತೆ ಯಾರು ಬಂದಾರು

ಗಿಡಮರಕೆ ಹೊಸವಸ್ತ್ರ ಯಾರು ತಂದಾರು

ಹಾಡೆಂದು ಕೋಗಿಲೆಯ ಕೂಗಿ ಕರೆದಾರು

ಮಾವಿನಾ ಚಿಗುರನ್ನು ತಿನಲು ಕೊಟ್ಟಾರು?

ಏನೋ ನಿರೀಕ್ಷೆ ಸೃಷ್ಟಿಯಲ್ಲೆಲ್ಲ

ಹೂಗಳ ಪರೀಕ್ಷೆ ದುಂಬಿಗಳಿಗೆಲ್ಲ

ಬಂದನೊ ವಸಂತ ಬಂದಿಗಳೇ ಎಲ್ಲ!

ಹೊಸ ಬಯಕೆ, ಹೊಸ ಅಲೆ ರುಚಿರುಚಿಯ ಬೆಲ್ಲ!

ಏನಿದೆಯೋ ಇಲ್ಲವೋ ಆಸೆಯೊಂದುಂಟು

ಬಾನಿನಲಿ ಹೊಸ ಸೂರ್ಯ ಬರುವ ಮಾತುಂಟು

ಸಂಜೆಯಲಿ ಮಿಂಚಿದರೆ ಅಂಚುಗಳ ಬಣ್ಣ,

ಕಪ್ಪಾದರೂ ಮುಗಿಲು ಜರಿ ಸೀರೆಯಣ್ಣ

ನೆನಪುಗಳ ಜೋಲಿಯಲಿ ತೂಗುವುದು ಮನಸು

ಕಟ್ಟುವುದು ಮಾಲೆಯಲಿ ಹೊಸ ಹೊಸಾ ಕನಸು

ನನಸಾಗದಿದ್ದರೂ ಕನಸಿಗಿದೆ ಘನತೆ

ತೈಲ ಯಾವುದೆ ಇರಲಿ ಉರಿಯುವುದು ಹಣತೆ

                                                         - ಡಾII ಎನ್. ಎಸ್. ಲಕ್ಷ್ಮೀನಾರಾಯಣ ಭಟ್ಟ

ನನ್ನ ಇನಿಯನ ನೆಲೆಯ ಬಲ್ಲೆಯೇನೆ?

ನನ್ನ ಇನಿಯನ ನೆಲೆಯ ಬಲ್ಲೆಯೇನೆ

ಹೇಗೆ ತಿಳಿಯಲಿ ಅದನು ಹೇಳೆ ನೀನೇ?

ಇರುವೆ ಹರಿಯುವ ಸದ್ದು

ಮೊಗ್ಗು ತೆರೆಯುವ ಸದ್ದು

ಮಂಜು ಸುರಿಯುವ ಸದ್ದು ಕೇಳುವವನು,

ನನ್ನ ಮೊರೆಯನೇಕೆ ಕೇಳನವನು?

ಗಿರಿಯ ಎತ್ತಲು ಬಲ್ಲ

ಶರಧಿ ಬತ್ತಿಸಬಲ್ಲ

ಗಾಳಿಯುಸಿರನೆ ಕಟ್ಟಿ ನಿಲ್ಲಿಸಬಲ್ಲ

ನನ್ನ ಸೆರೆಯಿಂದೇಕೆ ಬಿಡಿಸಲೊಲ್ಲ?

ನೀರು ಮುಗಿಲಾದವನು

ಮುಗಿಲು ಮಳೆಯಾದವನು

ಮಳೆ ಬಿದ್ದು ಬೆಳೆ ಎದ್ದು ತೂಗುವವನು,

ನಲ್ಲೆಯಳಲನ್ನೇಕೆ ಅರಿಯನವನು?

                                                    - ಡಾll ಎನ್. ಎಸ್. ಲಕ್ಷ್ಮೀನಾರಾಯಣ ಭಟ್ಟ 

ಮಲಗೋ ಮಲಗೆನ್ನ ಮರಿಯೆ

ಮಲಗೋ ಮಲಗೆನ್ನ ಮರಿಯೆ

ಬಣ್ಣದ ನವಿಲಿನ ಗರಿಯೆ

ಎಲ್ಲಿಂದ ಬಂದೆ ಈ ಮನೆಗೆ

ನಂದನ ಇಳಿದಂತೆ ಭುವಿಗೆ?

ತಾವರೆದಳ ನಿನ್ನ ಕಣ್ಣು

ಕೆನ್ನೆ ಮಾವಿನ ಹಣ್ಣು

ಸಣ್ಣ ತುಟಿಯ ಅಂದ

ಬಣ್ಣದ ಚಿಗುರಿಗು ಚಂದ

ನಿದ್ದೆಯ ಮರುಳಲ್ಲಿ ನಗಲು

ಮಂಕಾಯ್ತು ಉರಿಯುವ ಹಗಲು

ಒಲುಮೆ ಹರಸಿದ ಕಂದ

ಹುಣ್ಣಿಮೆ ದೇವಗು ಚೆಂದ

ಬೆಳಕ ಕರೆವ ಅರುಣ

ನಿನ್ನ ನಗೆಯ ಕಿರಣ

ಚೆಲುವಲ್ಲಿ ಸಾಟಿಯೆ ಕಾಮ?

ತಿಮ್ಮಪ್ಪನಿಗು ಮೂರು ನಾಮ !

                                                     - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಯಾಕೆ ಅವನ ಕಂಡೆನೋ !

ಯಾಕೆ ಅವನ ಕಂಡೆನೋ !

ಪ್ರೇಮದ ಸವಿಯುಂಡೆನೋ !

ಇಲ್ಲವಾಯಿತದೇ ಗಳಿಗೆ ನನ್ನದೆಲ್ಲವೂ,

ನಲ್ಲನನ್ನು ಬಿಟ್ಟು ಮನಸು ಹೃದಯ ನಿಲ್ಲವು

ನೂರು ಕಡೆಗೆ ಹಾಯುತ್ತಿದ್ದ
ಹೃದಯ ಇದೇ ಏನು?
ನೂರು ರುಚಿಯ ಬಯಸುತ್ತಿದ್ದ
ಮನಸು ಇದೇ ಏನು?
ಬಿಗಿದ ನಲ್ಲ ನನ್ನ ತನ್ನ ಸ್ಮರಣೆಯೊಂದಕೇ
ಸೆಳೆದನಲ್ಲ ನನ್ನ ಕಣ್ಣ ತನ್ನ ಚಂದಕೇ !

ಮುಗಿಲ ಹನಿಗೆ ಕಾಯುತಿರುವ
ಚಕ್ರವಾಕ ನಾನು,
ಚಂದ್ರಿಕೆಗೇ ಬೇಯುವಾ
ಚಕೋರಪಕ್ಷಿ ನಾನು,
ಯಾರು ಕಂಡರೇನು, ಏನು ಅಂದರೇನು?
ಲಜ್ಜೆ ತೊರೆದು ಹೆಜ್ಜೆಯಿಡುವ ಅವನ ದಾಸಿ ನಾನು

                                                         
                                                                - ಡಾll ಎನ್. ಎಸ್. ಲಕ್ಷ್ಮೀನಾರಾಯಣ ಭಟ್ಟ  

ಸಂಕ್ರಾಂತಿ ಹಬ್ಬದ ಶುಭಾಶಯಗಳು...

ಸ್ವಾಗತ ಸಂಕ್ರಾಂತಿಯೇ!

ಸ್ವಾಗತ ಸಂಕ್ರಾಂತಿಯೇ

ಕಾಲ ತರುವ ಕ್ರಾಂತಿಯೇ,

ಹೊಸ ಬಾಳಿಗೆ ಹಸೆ ಹಾಸುವ

ಮಿತ್ರಾರುಣ ಕಾಂತಿಯೇ

ಬರಿಹೆಜ್ಜೆಗೆ ಕಿರುಗೆಜ್ಜೆಯ ಕಟ್ಟುವಂಥ ಕರವೆ,

ಬಳಲಿದ ಕಾಲಿಗೆ ಬಲವನ್ನು ಊಡುವಂಥ ವರವೆ,

ಕನಸಿನ ಹೆದೆ ಚಿಮ್ಮಿ ಬಂದ ಆಕಾಂಕ್ಷೆಯ ಶರವೆ,

ಬವಣೆಯ ಭಾರವ ನೀಗಿ, ಬಾ ಓ ಸಂಕ್ರಾಂತಿಯೇ!

ಕಾಣದೊಂದು ಪಥಕಳೆಯುವ ಅನಿರೀಕ್ಷಿತ ಪಯಣವೆ

ಹೊಸ ಕಾಣ್ಕೆಗೆ ಎವೆ ಬಿಚ್ಚುವ ಬೆಳಕಿನೊಂದು ನಯನವೆ

ಎಳ್ಳು ಬೆಲ್ಲ ಜಲ್ಲೆ ಕಬ್ಬು ನಾಂದಿಯಾದ ಅಯನವೆ

ಭಾವೀ ದಿನಗಳ ಭಾಗ್ಯದ ಕದತೆರೆಯುವ ಕಿರಣವೆ!

ಬರಿ ಗಾಳಿಯೇ? ಬರಿ ಜಲವೇ? ಬರಿ ಬೆಳಕೇ? ಅಲ್ಲ,

ಬದಲಾಗಲಿ ಮುಡಿಯ ತನಕ ಇಡೀ ದೇಶವೆಲ್ಲ,

ಸತ್ಯ ಸ್ವಾಭಿಮಾನಯುಕ್ತ, ಬೇಧಮುಕ್ತ ಮನವ

ನೀಡಲಿ ಈ ಸಂಕ್ರಾಂತಿ ನೀಡಲಿ ಹೊಸ ದಿನವ

                                                  - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಇಂದಿನ ಸಂಕ್ರಾಂತಿ

ಬಳಲಿದ ಬಾಳಿಗೆ ಭರವಸೆಯಾಗಲಿ

ಇಂದಿನ ಸಂಕ್ರಾಂತಿ

ಒಣಗಿದ ಹಾಳೆಗೆ ಹೊಸ ಮಳೆ ಸುರಿಯಲಿ

ಮೂಡಲಿ ಶುಭಶಾಂತಿ

ದಿಕ್ಕುಗಳೆಲ್ಲವು ಪ್ರಸನ್ನವಾಗಲಿ

ಬೀಸಲಿ ತಂಗಾಳಿ

ಬತ್ತಿದ ನದಿಗಳ ಪಾತ್ರವು ತುಂಬಲಿ

ಗಂಗೆಯೆ ಮೈತಾಳಿ

ತೂಗುತಿರಲಿ ಹೊಲಗದ್ದೆಗಳು

ತೆನೆಯ ಹಾರವಾಗಿ

ಹಣ್ಣು ತುಂಬಿ ಮರ ನಗುತಿರಲಿ

ಬಣ್ಣದ ತೇರಾಗಿ!

ಬಾ ಸಂಕ್ರಾಂತಿಯೇ ವರವಾಗಿ

ಜೀವಸ್ವರವಾಗಿ

ಸೋತ ದೇಹಗಳು ಚೇತನವ

ತುಂಬಲು ನೆರವಾಗಿ

ಬಡವರ ದೀನರ ಬಾಳಿನಲಿ

ತೃಪ್ತಿಯ ನಗೆಯಾಗಿ

ನನಸಾಗುವ ಹೊಸ ಕನಸುಗಳ

ಬಿತ್ತುವ ಕರವಾಗಿ

                                                       - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಹೊಸವರ್ಷದ ಹಾರ್ದಿಕ ಶುಭಾಶಯಗಳು....

ಮೂಡಿ ಬರಲಿ ಹೊಸ ವರುಷ

ಮೂಡಿ ಬರಲಿ ಹೊಸ ವರುಷದ

ಹೊಸ ಕಾಂತಿಯ ತಾರೆ

ಸಾಗಿ ಬರಲಿ ಮೇಲಿನಿಂದ

ಹೊಸ ಬೆಳಕಿನ ಧಾರೆ

ಹಸಿದ ಪುಟ್ಟ ಕಂದಮ್ಮಗೆ

ಹೊಟ್ಟೆ ತುಂಬ ಹಾಲು

ದುಡಿವೆ ಎನುವ ಕೈ ಕಾಲಿಗೆ

ಕೆಲಸವಿರುವ ಬಾಳು

ಹಬ್ಬುತಿರುವ ಬಳ್ಳಿಗಳಿಗೆ

ಹಂಬಿನ ಆಧಾರ

ಆಗಲಿ ಈ ಹೊಸವರುಷ

ಸಮೃದ್ಧಿಯ ತೀರ

ಬಾಯಿ ತೆರೆದ ಕೆರೆಗಳಿಗೆ

ಕುಡಿವಷ್ಟೂ ನೀರು

ಮುಡಿಬಿಚ್ಚಿದ ಗಿಡಗಳಿಗೆ

ತೊಡುವಷ್ಟೂ ಹೂವು

ಒಣಮಡಿಕೆಯ ಗದ್ದೆಗಳಿಗೆ

ತೆನೆದೂಗುವ ಬಾಳು

ಕರುಣಿಸಲೀ ಹೊಸವರುಷ

ಕವಿತೆಗೆ ಹೊಸ ಸಾಲು

                                           - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಹಾಡುವ ಹಕ್ಕಿಗೆ ಹೂವಿನ ರೆಂಬೆ

ಹಾಡುವ ಹಕ್ಕಿಗೆ ಹೂವಿನ ರೆಂಬೆ

ಕಂದನ ಕೈಗೆ ಬಣ್ಣದ ಗೊಂಬೆ

ಆಶೀರ್ವದಿಸಲಿ ಈ ಹೊಸ ವರ್ಷ

ಪ್ರಾಯದ ಗಂಡಿಗೆ ಪ್ರೀತಿಯ ರಂಭೆ

ಖಾಲಿ ಆಗಸಕೆ ಕಪ್ಪನೆ ಮೋಡ

ಬೆಂದ ಜೀವಕೆ ಬೆಚ್ಚನೆ ಗೂಡ

ಬಾಗಿನ ನೀಡಲಿ ಈ ಹೊಸ ವರ್ಷ

ಕವಿ ಕಲ್ಪನೆಗೆ ಹೊಸ ಹೊಸ ಹಾಡ

ನಲ್ಲಿಯ ಬಾಯಿಗೆ ನಿಲ್ಲದ ನೀರು

ಹೊತ್ತು ಹೊತ್ತಿಗೆ ತಪ್ಪದೆ ಹಾಲು

ಸಿಗುವಂತಾಗಲಿ ಈ ಹೊಸ ವರ್ಷ

ಬಡವರಿಗೂ ಮೈ ತುಂಬಾ ನೂಲು

ಬಿರಿದ ಭೂಮಿಗೆ ಸುರಿಯುವ ಧಾರೆ

ಮಿರಿ ಮಿರಿ ಮಿಂಚಿನ ಗದ್ದೆಯ ಮೋರೆ

ತರುವಂತಾಗಲಿ ಈ ಹೊಸ ವರ್ಷ

ಮೆರೆಯಲಿ ನಾಡಿನ ಭಾಗ್ಯದ ತಾರೆ

                                           - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಹೊಸ ಆಸೆಗೆ ಕಾರಣವೇ

ಹೊಸ ಆಸೆಗೆ ಕಾರಣವೇ

ಹೊಸ ಕಾಲದ ತೋರಣವೇ

ಶುಭ ನಾಂದಿಗೆ ಪ್ರೇರಣವೇ

ಹೊಸ ವರ್ಷವೆ ಬಾ

ಬಣಗುಡುವಾ ಒಣಬಾಳಿಗೆ ತೆನೆ ಪಯಿರನು ತಾ

ಮಣ್ಣ ಸೀಳಿ ಏಳುವಂತೆ

ಥಣ್ಣಗಿರುವ ಚಿಲುಮೆ,

ಹಣ್ಣ ತುಂಬಿ ನಿಲ್ಲುವಂತೆ

ರಸರೂಪದ ಒಲುಮೆ,

ಹುಣ್ಣಿಮೆಯ ಶಾಂತಿಯನ್ನೆ   

ಹೃದಯದಲ್ಲಿ ಹರಿಸು

ಬಣ್ಣಗಳನು ದಾಟಿ ನಿಜವ ತಲುಪುವಂತೆ ಹರಸು

ಮರಮರವೂ ಮುಡಿದು ನಿಲಲಿ

ಬಂಗಾರದ ಚಿಗುರ

ನರನರನೂ ನೋವ ನುಂಗಿ

ಮೇಲೇಳಲಿ ಹಗುರ

ಹರಹರೆಗೂ ಹಾರಿಬರಲಿ

ಹಕ್ಕಿ ಮಾಲೆ ಮಾಲೆ,

ಕರೆ ನೀಡಲಿ ಎಲ್ಲರಿಗೂ ಶುಭ ಉಣಿಸುವ ನಾಳೆ

                                                - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಬಾಗಿಲ ಬಡಿದಿದೆ ಭಾವೀ ವರ್ಷ 

ಬಾಗಿಲ ಬಡಿದಿದೆ ಭಾವೀ ವರ್ಷ

ಬಗೆ ಬಗೆ ಭರವನೆ ನೀಡಿ

ಭ್ರಮೆ ನಮಗಿಲ್ಲ ನೋವೋ ನಲಿವೋ

ಬರುವುದ ಕರೆವೆವು ಹಾಡಿ

ಎಲ್ಲ ನಿರೀಕ್ಷೆ ಸಮಯ ಪರೀಕ್ಷೆಗೆ

ಕೂರದೆ ವಿಧಿಯೇ ಇಲ್ಲ

ಕೂತದ್ದೆಲ್ಲ ಪಾಸಾದೀತೆ?

ಜೊತೆ ಜೊತೆ ಬೇವೂ ಬೆಲ್ಲ

ಕಾಲದ ಚೀಲದೊಳೇನೆ ಇರಲಿ

ಕಾಣದ ಅನುಭವ ನೂರು

ಎಲ್ಲವು ಇರಲಿ ನಿಲ್ಲದೆ ಬರಲಿ

ಸರಿಗಮ ಪದನಿಸ ಅರಳಿ

ಸುಖವೊ ದುಃಖವೊ ಒಂದೇ ಬಂದರೆ

ಏನಿದೆ ಅದರಲಿ ಘನತೆ?

ಎರಡೂ ಬೆರೆದು, ಬಹುಸ್ವರ ನುಡಿದು

ಮೂಡುವುದೇ ನಿಜಗೀತೆ!

                                                         - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಎಂಥ ಚೆಲುವೆ ನನ್ನ ಹುಡುಗಿ 

ಎಂಥ ಚೆಲುವೆ ನನ್ನ ಹುಡುಗಿ 

ಹೇಗೆ ಅದನು ಹೇಳಲಿ?

ಮಾತಿನಾಚೆ ನಗುವ ಮಿಂಚ

ಹೇಗೆ ಹಿಡಿದು ತೋರಲಿ?

ಕಾಲಿಗೊಂದು ಗೆಜ್ಜೆ ಕಟ್ಟಿ

ಹೊರಟಂತೆ ಪ್ರೀತಿ,

ಝಲ್ಲೆನಿಸಿ ಎದೆಯನು

ಬೆರಗಲ್ಲಿ ಕಣ್ಣನು

ಸೆರೆಹಿಡಿಯುವ ರೀತಿ.

ಬೆಳಕೊಂದು ಸೀರೆಯುಟ್ಟು

ತೇಲಿನಡೆವ ರೂಪ,

ಗರ್ಭಗುಡಿಯಲಿ

ದೇವರೆದುರಲಿ

ಉರಿವ ಶಾಂತದೀಪ.

ರಾಗದಲ್ಲಿ ಸೇರಿ ಕವಿತೆ

ಹಾಡು ಮೂಡುವಂತೆ,

ಸಂಜೆ ಸುಳಿವ ಗಾಳಿಗೆ

ಹೊನ್ನ ಬಿಸಿಲ ಲೀಲೆಗೆ

ಮುಗಿಲಾಡುವಂತೆ

                                                 - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಬಾರೆ ನನ್ನ ದೀಪಿಕಾ 

ಬಾರೆ ನನ್ನ ದೀಪಿಕಾ

ಮಧುರ ಕಾವ್ಯ ರೂಪಕ

ಕಣ್ಣ ಮುಂದೆಸುಳಿಯೆ ನೀನು

ಕಾಲದ ತೆರೆ ಸರಿದು ತಾನು

ಜನುಮ ಜನುಮ ಜ್ಞಾಪಕ!

ನಿನ್ನ ಬೊಗಸೆ ಕಣ್ಣಿಗೆ

ಕೆನ್ನೆ ಜೇನುದೊನ್ನೆಗೆ

ಸಮ ಯಾವುದೆ ಚೆನ್ನೆ ನಿನ್ನ

ಜಡೆ ಹರಡಿದ ಬೆನ್ನಿಗೆ?

ನಿನ್ನ ಕನಸು ಬಾಳಿಗೆ

ಧೂಪದಂತೆ ಗಾಳಿಗೆ ;

ಬೀಸಿ ಬರಲು, ಜೀವ ಹಿಗ್ಗಿ

ವಶವಾಯಿತೆ ಧಾಳಿಗೆ!

ಮುಗಿಲಮಾಲೆ ನಭದಲಿ

ಹಾಲುಪಯಿರು ಹೊಲದಲಿ

ರೂಪಿಸುತಿದೆ ನಿನ್ನ ಪ್ರೀತಿ

ಕವಿತೆಯೊಂದ ಎದೆಯಲಿ!

                                                                   - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ

ಹೇಗೆ ಬರಲಿ ಇನಿಯ ನಿನ್ನ ಬಳಿಗೆ?

ಧೋ ಎಂದು ಸುರಿಯುತಿದೆ ಭಾರಿ ಮಳೆ ಇಲ್ಲಿ,
ಗಾಳಿ ಚೀರುತ್ತಲಿದೆ ಎಲ್ಲ ದಿಕ್ಕಲ್ಲಿ,
ನಿನ್ನ ಬಿಟ್ಟಿರಲಾರೆ ಇಂಥ  ಹೊತ್ತಲ್ಲಿ.
ಹೇಗೆ ಬರಲಿ ನಿನ್ನ ಬಳಿಗೆ ಇನಿಯ?
ಕೇಳಬೇಕಿದೆ ನಿನ್ನ ಜೇನುದನಿಯ.

ಇಂಗಿ ಹೋಯಿತು ಸಂಜೆ ಇರುಳ ಸೆರಗಲ್ಲಿ,
ಭಂಗ ಪಡುತಿವೆ ತಾರೆ ಮುಗಿಲ ಮರೆಯಲ್ಲಿ,
ನಿನ್ನ ಬಿಟ್ಟಿರಲಾರೆ ಇಂಥ  ಹೊತ್ತಲ್ಲಿ.
ಹೇಗೆ ತಲುಪಲಿ ಹೇಳು ನಿನ್ನ ಮನೆಯ?
ಹೇಗೆ ಸೇರಲಿ ಪ್ರೀತಿಪಥದ ಕೊನೆಯ?

ಹಳ್ಳ ಕೂಗುತ್ತಲಿದೆ ತುಂಬಿ ಮಳೆಯಲ್ಲಿ,
ಮನವೊ ಕುದಿಯುತ್ತಲಿದೆ ನಿನ್ನ ನೆನಪಲ್ಲಿ,
ನಿನ್ನ ಬಿಟ್ಟಿರಲಾರೆ ಇಂಥ  ಹೊತ್ತಲ್ಲಿ.
ಹೇಗೆ ಬರಲಿ ಇನಿಯ ನಿನ್ನ ಬಳಿಗೆ?
ಕರಗಬೇಕೋ ನಿನ್ನ ಪ್ರೀತಿಯೊಳಗೆ!

                                                  - ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ
                                                     ' ಹಸಿರು ತುಂಬಿದ ಕಣಿವೆ '

 ಎಲ್ಲಿ ಜಾರಿತೋ ಮನವು 

 ಎಲ್ಲಿ ಜಾರಿತೋ ಮನವು

ಎಲ್ಲೆ ಮೀರಿತೋ

ಎಲ್ಲಿ ಅಲೆಯುತಿಹುದೋ, ಏಕೆ

ನಿಲ್ಲದಾಯಿತೋ!

ದೂರದಿಂದ ತೀರದಿಂದ

ತೇಲಿ ಪಾರಿಜಾತ ಗಂಧ

ದಾಟಿ ಬಂತು ಬೇಲೀ ಸಾಲ

ಮೀಟಿ ಹಳೆಯ ಮಧುರ ನೋವ

ಬಾನಿನಲ್ಲಿ ಒಂಟಿ ತಾರೆ

ಸೋನೆ ಸುರಿವ ಇರುಳ ಮೋರೆ

ಕತ್ತಲಲ್ಲಿ ಕುಳಿತು ಒಳಗೆ

ಬಿಕ್ಕುತಿಹಳು ಯಾರೋ ನೀರೆ

ಹಿಂದೆ ಯಾವ ಜನ್ಮದಲ್ಲೊ

ಮಿಂದ ಪ್ರೇಮ ಜಲದ ಕಂಪು

ಬಂದು ಕಾಡುತಿರಲು ಎದೆಯ

ಹೇಳಲಾರೆ ತಾಳಲಾರೆ

                                                         - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ

               ಈ ಭಾವಗೀತೆಯನ್ನು ಆಲಿಸಿ

ನೀರ ಮೇಲಿನ ಲೀಲೆ

ನೀರ ಮೇಲಿನ ಲೀಲೆ ನಮ್ಮದೀ ಜೀವನ

ಗಾಳಿ ನೂಕಿದ ತೀರ ಸೇರಿ ಪಯಣ ಪಾವನ

ಯಾರಿಗೂ ತಿಳಿಯದಂಥ

 ನೂರುಗುಟ್ಟು ನೀರಲಿ

ಧೀರರಿಗೆ ಮಾತ್ರ ದೊರೆವ

ಮುತ್ತು ರತ್ನ ತಳದಲಿ

ದೂರದ ತಾರೆಯೆ ದೀಪ ನಮಗೆ ಇರುಳಲಿ

ತೀರವ ಬಿಟ್ಟ ಗಳಿಗೆ

ನೀರೇ ನಮ್ಮ ದೇವರು

ದಡ ಸೇರಿದ ಮೇಲೆ ಮಾತ್ರ

ಅಪ್ಪ ಅಮ್ಮ ಮನೆ ಮಾರು

ದಡದಲಿ ಕಾಯ್ವರು ಬೆದರುಗಣ್ಣ ಹೆಂಡಿರು

ಮನೆ ಸೇರಿ ಮಲಗುವಾಸೆ

ಉರಿವುದೆಮ್ಮ ಎದೆಯಲಿ

ಕುಣಿಯುವ ಚಿಣ್ಣರನು

ಎತ್ತುವಾಸೆ ಹೆಗಲಲಿ

ಸಲಿಸಲಿ ಈ ಆಸೆಯ ಕರುಣಿ ದೈವ ನಿಜದಲಿ

                                                  - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ

ನಿಂತ ನೀರ ಕಲಕಬೇಡಿ

ನಿಂತ ನೀರ ಕಲಕಬೇಡಿ ಕಲ್ಲುಗಳೇ

ಹೂ ದಳಗಳ ಇರಿಯಬೇಡಿ ಮುಳ್ಳುಗಳೇ

ಏನಿದೆಯೋ ನೋವು ಅವಕೆ ತಮ್ಮದೇ

ಬಾಳಲು ಬಿಡಿ ತಮ್ಮಷ್ಟಕೆ ಸುಮ್ಮನೇ

ಪಂಜರದಲಿ ನೂಕಬಹುದೆ ಗಿಳಿಯನು

ನೂಕಿ ಸುರಿದರಾಯ್ತೆ ರಾಶಿ ಕಾಳನು?

ತಿನುವುದೊಂದೆ ಗುರಿಯೆ ಹೇಳಿ ಬಾಳಿಗೆ

ಪರರ ಬಾಳು ಬಲಿಯೆ ನಮ್ಮ ಲೀಲೆಗೆ?

ಮರವ ತಬ್ಬಿ ಹಿಗ್ಗುತಲಿದೆ ಬಳ್ಳಿ

ಚಿಂತೆಯಿಲ್ಲ ಸರಿಸಿ ಅಲ್ಲಿ ಇಲ್ಲಿ

ಚಿವುಟಬೇಡಿ ಮಾತ್ರ ಅದರ ತುದಿಯ

ಕೊಲ್ಲಬೇಡಿ ಕಲ್ಲುಮಾಡಿ ಎದೆಯ

ಯಾವ ಜೀವ ಯಾವ ನೋವಿಗೀದೋ

ಯಾವ ಭಾವ ನೆಮ್ಮಿ ಅದರ ಪಾಡೋ?

ಮಾಡಲುಬಿಡಿ ತನ್ನ ಯಾತ್ರೆ ತಾನು

ನೀಡಲಿ ಅದು ತನ್ನೊಳಗಿನ ಜೇನು

                                                - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ