ಎಂದೂ ಕಾಣದಂಥ ಕನಸು
ಎಂದೂ ಕಾಣದಂಥ ಕನಸು
ಬಂದು ಮನವ ತಾಗಿತು
ಬಂದ ಗಳಿಗೆ ಎಂತೊ ಏನೊ
ಅಲ್ಲೆ ಮನೆಯ ಹೂಡಿತು
ನಿಂತ ಕಡೆಯೆ ಬೇರನೂರಿ
ಆಳ ಅಗಲ ಹರಡಿತು
ಧಗೆ ತುಂಬಿದ ನೆಲದ ಎದೆಗೆ
ಹಸಿರು ಮಾತ ಉಸುರಿತು
ತೀರುತಿರುವ ಹರುಷದಂತೆ
ಆರುತಿರುವ ದೀಪವು
ಮೀರಿ ಉರಿದು ಕೊರಗು ಹರಿದು
ಕೊನೆಯಾಯಿತು ಶಾಪವು
ಜೀವ ಭಾವ ಕಾವು ನಿಂತು
ಬೆರಗು ಮುಳ್ಳು ಕಲ್ಲಿಗೂ
ಕವಿತೆ ಬೆಳೆದ ಕಂಪು ಬಂತು
ಅಲ್ಲಿ ಇಲ್ಲಿ ಎಲ್ಲಿಗೂ
- ಡಾII ಎನ್. ಎಸ್. ಲಕ್ಷ್ಮೀನಾರಾಯಣ ಭಟ್ಟ
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ