ನನ್ನ ಹಳೆಯ ಹಾಡುಗಳೇ

ನನ್ನ ಹಳೆಯ ಹಾಡುಗಳೆ, ನನ್ನೊಳಿರಲಿ ನಿಮ್ಮ ದಯಾ

ನಾನು ಒಂಟಿ ನನ್ನೊಡನಿದೆ

ಚಡಪಡಿಸುವ ಒಂದು ಹೃದಯಾ II

ನೋಡಬೇಡಿ ತಿವಿಯುವಂತೆ

ಬಿಡದಿರಿ ಬಿಸಿಯುಸಿರು

ಕರೆಯಬೇಡಿ ಕಣ್ಣನೀರು

ಅಳಿಸುವಂತೆ ಹೆಸರು.

ಇರುಳಿನಲ್ಲಿ ಸುರಿವ ಮಳೆ

ಆಳದಲ್ಲಿ ಮೊರೆವ ಹೊಳೆ

ಇಳಿಸಬೇಡಿ ದೋಣಿ ಹೊಳೆಗೆ

ಉಕ್ಕುತಿರುವ ಇರುಳಿನೊಳಗೆ II

ನೀಡಬೇಡಿ ಭರವಸೆಗಳ

ಸೀಳಿದೆ ನಾ ನಿಂತ ನೆಲ

ನುಡಿಸಬೇಡಿ ಮತ್ತೆ ಕೊಳಲು

ಚಿಮ್ಮುವಂತೆ ಒಳಗಿನಳಲು II

                                             - ಎಚ್.ಎಸ್. ವೆಂಕಟೇಶ ಮೂರ್ತಿ

                                               ' ಗೀತ ಸಂಪದ '