ಕವಿತೆ
                                                                    
ಗೂಡಿಂದಾಚೆ  ಹಾರುತ್ತವೆ ಕವಿತೆಗಳು 
ನೀಲಿಮೆಯಲ್ಲಿ ರೆಕ್ಕೆ ಬಡಿಯುತ್ತ
ಅಗಾಧ ಕತ್ತಲೆಯಲ್ಲಿ ತಾರೆಗಳ ಜತೆಗೆ
ಕನಸು ಕಾಣುತ್ತ -

ಕುಣಿಯುತ್ತವೆ ಹರೆಯದೆದೆಯಲ್ಲಿ
ಚಂಡೆ ಮದ್ದಳೆ ದನಿಗೆ ಹೆಜ್ಜೆ ಹಾಕುತ್ತ,
ದ್ರೌಪದೀ ಸ್ವಯಂವರದಲ್ಲಿ
ಬಿಲ್ಲಿಗೆ ಹೆದೆಯೇರಿಸುತ್ತ -

ಹಾಯುತ್ತವೆ ಹತ್ತೂ ಕಡೆಗೆ ಕವಿತೆಗಳು
ಅಪರಂಪಾರ ಪಾರಾವರ -
ದಲೆಗಳ ಮೇಲೆ ಹಾಯಿ ಬಿಚ್ಚುತ್ತಾ,
ಮೇಘಮಾಲೆಗಳಾಗಿ ಆಕಾಶದಾದ್ಯಂತ
ಸಂಚರಿಸುತ್ತ, ಮಣ್ಣೊಳಗೆ
ಮಲಗಿರುವ ಬೀಜಗಳ ಕಣ್ಣು ತೆರೆಸುತ್ತ -

ಪುಟಿಯುತ್ತವೆ ಹದವಾದ ನೆಲದಲ್ಲಿ
ಗಿಡಗಿಡದ ತುಂಬಾ ಹೂವರಳಿ
ಕಂಪಿನ ಕಹಳೆಯೂದುತ್ತ,
ದುಂಬಿಗಳ ಕರೆದು ಟೊಂಗೆ ಟೊಂಗೆಗಳಲ್ಲಿ
ಜೇನು ಕಟ್ಟುತ್ತ -

                                                                      - ಜಿ. ಎಸ್. ಶಿವರುದ್ರಪ್ಪ