ಬಾಗಿಲ ಬಡಿದಿದೆ ಭಾವೀ ವರ್ಷ 

ಬಾಗಿಲ ಬಡಿದಿದೆ ಭಾವೀ ವರ್ಷ

ಬಗೆ ಬಗೆ ಭರವನೆ ನೀಡಿ

ಭ್ರಮೆ ನಮಗಿಲ್ಲ ನೋವೋ ನಲಿವೋ

ಬರುವುದ ಕರೆವೆವು ಹಾಡಿ

ಎಲ್ಲ ನಿರೀಕ್ಷೆ ಸಮಯ ಪರೀಕ್ಷೆಗೆ

ಕೂರದೆ ವಿಧಿಯೇ ಇಲ್ಲ

ಕೂತದ್ದೆಲ್ಲ ಪಾಸಾದೀತೆ?

ಜೊತೆ ಜೊತೆ ಬೇವೂ ಬೆಲ್ಲ

ಕಾಲದ ಚೀಲದೊಳೇನೆ ಇರಲಿ

ಕಾಣದ ಅನುಭವ ನೂರು

ಎಲ್ಲವು ಇರಲಿ ನಿಲ್ಲದೆ ಬರಲಿ

ಸರಿಗಮ ಪದನಿಸ ಅರಳಿ

ಸುಖವೊ ದುಃಖವೊ ಒಂದೇ ಬಂದರೆ

ಏನಿದೆ ಅದರಲಿ ಘನತೆ?

ಎರಡೂ ಬೆರೆದು, ಬಹುಸ್ವರ ನುಡಿದು

ಮೂಡುವುದೇ ನಿಜಗೀತೆ!

                                                         - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ