ಉಂಗುರ

ಗಾಳಿ ಆಡಿದರೆ ಬನವೂ ಆಡಿ

ಹೂವಿನುಂಗುರ;

ಮಳೆ ಮೂಡಿದರೆ ಕೆರೆಯೂ ಆಡಿ

ನೀರಿನುಂಗುರ;

ತಾರೆ ಧುಮುಕಿದರೆ ಬಾನಿಗೆ ಬಾನೆ

ಬೆಳಕಿನುಂಗುರ;

ಕಣ್ಣತುಂಬಿ ಬಹ ನಿದ್ದೆಯ ಬೆರಳಿಗೆ

ಕನಸಿನುಂಗುರ;

ತುಂಬದ ಒಡಲಿಗೆ ತಾಂಬೂಲದ ತುಟಿ 

ಬೆಂಕಿಯುಂಗುರ;

ಬಾಳ ಕಾಣದಿಹ ಕಲ್ಲ ಕಣ್ಣಿನಲಿ

ಮಣ್ಣಿನುಂಗುರ;

ಒಲ್ಲದ ಹೆಣ್ಣಿನ ಸಲ್ಲದ ಬಯಕೆಗೆ

ಎಲ್ಲೋ ದೂರದ

ಕನಸನೂಡಿಸುವ ಕೊರಗಿನ ಬೆರಳಿಗೆ

ಆಸೆಯುಂಗುರ;

ಎದೆಯ ಕತ್ತಲೆಯ ಪೊದೆಯಲಿ, ಕಮಲಾ,

ವಜ್ರದುಂಗುರ;

ನಿನ್ನ ಕೆನ್ನೆಯಲಿ ಮೆಲ್ಲಗೆ ನನ್ನಾ

ಪ್ರೇಮದುಂಗುರ.

                               - ಕೆ.ಎಸ್. ನರಸಿಂಹಸ್ವಾಮಿ

                                ' ಉಂಗುರ '