ತಾಯಿ - ಕೂಸು

೧

ಹಸುಗೂಸು ಮಲಗಿಹುದು

ಹುಸಿನಗೆಯು ತೊಲಗಿಹುದು.

ಕನಸಿನಾಚೆಗಿರುವ ನಿದ್ದೆಯಲ್ಲಿ

ತನ್ನನ್ನೂ ಮರೆತಿಹುದೊ

ತನ್ನೊಳಗೆ ಬೆರೆತಿಹುದೊ

ಹಸಿವು ಭಯ ಮುದ್ದಾಟವಿಲ್ಲ ಅಲ್ಲಿ.

೨

ಉಸಿರ ದಾರದ ತುದಿಗೆ

ಹಾರುಹಕ್ಕಿಯ ಬದಿಗೆ

ಜೀವಪಟ ಹೆಡೆಯಾಟವಾಡುತಿಹುದು

ಮೇಲ್ಮುಗಿಲ ಗಾಳಿಯಲಿ

ತನ್ನೊಂದು ಲೀಲೆಯಲಿ

ತೀರಲದು ತಾನೆ ಇಳೆಗಿಳಿಯಲಹುದು.

೩

ಕೆಲಸದಲಿ ಬಿಡುವಿಲ್ಲ

ಕೂಸಿನಲಿ ಮನವೆಲ್ಲ

ತಾಯಿ ಯೋಗಿನಿ ಮೈಲಿ ದುಡಿಯುತಿಹಳು

ತನ್ನೆದೆಯ ತೊಟ್ಟಿಲಲಿ

ಕಂದನನು ಇಟ್ಟಲ್ಲಿ

ಕಂಠದಲಿ ಜೋಗುಳವ ನುಡಿಸುತಿಹಳು

೪

ಇತ್ತ ಮರುಳಾಟದಲೊ

ಜೀವದೊಳತೋಟಿಯಲೊ

ಮುಖರಂಗಮಂಡಲದಿ ಭಾವ ಭಾವ!

ಹುಬ್ಬು ಗಂಟಿಕ್ಕುವುದು ;

ಎದೆ ಏಕೊ ಬಿಕ್ಕುವುದು ;

ತುಟಿಯು ನಗುವುದು ; ಅದನು ಕಂಡನಾವ?

                                                        - ದ.ರಾ. ಬೇಂದ್ರೆ
                                                            ' ನಾದಲೀಲೆ '