ಅಕ್ಕಕ್ಕು ಹಾಡುಗಳೇ

ಅಕ್ಕಕ್ಕು ಹಾಡುಗಳೇ

ಹಾಡಿನI ಅಚ್ಚಚ್ಚ ಕನಸುಗಳೇ IIಪII

ಬನ್ನಿರಿ ಇನ್ನಿಲ್ಲಿಗೆ IIಪII

ಬರಗಾಲ ಬಂತೆಂದು ಬರವೇನೊ ಹಾಡಿಗೆ

ಮನಸಿನ ನಿನ್ನ ಕನಸಿಗೆI

ಹರಿಯುವ ಹಾಡನ್ನ ಕತ್ತಲ್ಲಿ ಅಮುಕದೆ

ಬಿಡಬೇಕೋ ತಮ್ಮಾ ಬಯಲಿಗೆI

ಆಕಾಶದಲಿ ಕೊನೆ ನಕ್ಷತ್ರ ಇರುವನಕ

ಕನಸು ಇರತಾವಂತ ಹಾಡಬೇಕೋII

ಕ್ಷಿತಿಜದ ಕಣ್ಣಲ್ಲಿ ಬೆಳಕು ಹೊಳೆಯೋ ಹಾಂಗ

ಹಾಡಬೇಕೋ ತಮ್ಮಾ ಹಾಡಬೇಕುI

ಕಲ್ಲಿನ ಎದೆಯಲ್ಲಿ ಜೀವಜಲ ಚಿಲ್ಲೆಂದು

ಚಿಮ್ಮುವಂಥಾ ಹಾಡ ಹಾಡಬೇಕುI

ಆಕಾಶದಂಗಳ ಬೆಳದಿಂಗಳೂ ಕೂಡಾ

ಕಂಗಾಲಾಗುವ ಹಾಡು ಹಾಡಬೇಕೊII

ತಂಗಾಳಿ ಪರಿಮಳಿಸಿ ತವಕಗೊಳ್ಳುವ ಹಾಂಗ

ಹಾಡಬೇಕೋ ತಮ್ಮಾ ಹಾಡಬೇಕೊI

ಚಿಗುರುವಾಸೆಯ ಬಿಟ್ಟ ಹಸಿರು ಕೆರಳುವ ಹಾಂಗ

ಹಾಡಬೇಕೋ ತಮ್ಮಾ ಹಾಡಬೇಕೊI

ನಾದಮಯ ಶಬ್ದದಲಿ ಹೂಬಿಡುವ ಕನಸುಗಳ

ಹಾಡಬೇಕೋ ತಮ್ಮಾ ಹಾಡಬೇಕೊII

                                     - ಡಾ. ಚಂದ್ರಶೇಖರ ಕಂಬಾರ