ಹಾಡುವ ಹಕ್ಕಿಗೆ ಹೂವಿನ ರೆಂಬೆ

ಹಾಡುವ ಹಕ್ಕಿಗೆ ಹೂವಿನ ರೆಂಬೆ

ಕಂದನ ಕೈಗೆ ಬಣ್ಣದ ಗೊಂಬೆ

ಆಶೀರ್ವದಿಸಲಿ ಈ ಹೊಸ ವರ್ಷ

ಪ್ರಾಯದ ಗಂಡಿಗೆ ಪ್ರೀತಿಯ ರಂಭೆ

ಖಾಲಿ ಆಗಸಕೆ ಕಪ್ಪನೆ ಮೋಡ

ಬೆಂದ ಜೀವಕೆ ಬೆಚ್ಚನೆ ಗೂಡ

ಬಾಗಿನ ನೀಡಲಿ ಈ ಹೊಸ ವರ್ಷ

ಕವಿ ಕಲ್ಪನೆಗೆ ಹೊಸ ಹೊಸ ಹಾಡ

ನಲ್ಲಿಯ ಬಾಯಿಗೆ ನಿಲ್ಲದ ನೀರು

ಹೊತ್ತು ಹೊತ್ತಿಗೆ ತಪ್ಪದೆ ಹಾಲು

ಸಿಗುವಂತಾಗಲಿ ಈ ಹೊಸ ವರ್ಷ

ಬಡವರಿಗೂ ಮೈ ತುಂಬಾ ನೂಲು

ಬಿರಿದ ಭೂಮಿಗೆ ಸುರಿಯುವ ಧಾರೆ

ಮಿರಿ ಮಿರಿ ಮಿಂಚಿನ ಗದ್ದೆಯ ಮೋರೆ

ತರುವಂತಾಗಲಿ ಈ ಹೊಸ ವರ್ಷ

ಮೆರೆಯಲಿ ನಾಡಿನ ಭಾಗ್ಯದ ತಾರೆ

                                           - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ