ಬನ್ನಿ ನನ್ನ ಹೃದಯಕೆ
ದೀಪವಿರದ ದಾರಿಯಲ್ಲಿ
ತಡವರಿಸುವ ನುಡಿಗಳೇ
ಕಂಬನಿಗಳ ತಲಾತಲದಿ
ನಂದುತಿರುವ ಕಿಡಿಗಳೇ
ಉಸಿರನಿಡುವೆ
ಹೆಸರ ಕೊಡುವೆ
ಬನ್ನಿ ನನ್ನ ಹೃದಯಕೆ.
ನೀಲಿಯಲ್ಲಿ ಮೈಯಿಲ್ಲದೆ
ತೇಲಾಡುವ ಹನಿಗಳೇ
ಬಾಯಿಲ್ಲದ ಮೌನದಲ್ಲಿ
ಅಲೆಯುತಿರುವ ದನಿಗಳೇ
ಉಸಿರನಿಡುವೆ
ಹೆಸರ ಕೊಡುವೆ
ಬನ್ನಿ ನನ್ನ ಹೃದಯಕೆ.
ಜಲವಿಲ್ಲದ ನೆಲಗಳಲ್ಲಿ
ಕಮರುತಿರುವ ಕುಡಿಗಳೇ
ಬಿರುಬಿಸಿಲಿನ ತುಳಿತದಲ್ಲಿ
ಸೊರಗಿ ಹೋದ ಮಿಡಿಗಳೇ
ಉಸಿರನಿಡುವೆ
ಹೆಸರ ಕೊಡುವೆ
ಬನ್ನಿ ನನ್ನ ಹೃದಯಕೆ.
ಶ್ರುತಿಯಿಲ್ಲದ ವಾದ್ಯದಲ್ಲಿ
ಗತಿಯಿಲ್ಲದ ಸ್ವರಗಳೇ
ಬಿರುಗಾಳಿಗೆ ಗರಿಯುದುರಿದ
ಹೊಂಗನಸಿನ ಮರಿಗಳೇ
ಉಸಿರನಿಡುವೆ
ಹೆಸರ ಕೊಡುವೆ
ಬನ್ನಿ ನನ್ನ ಹೃದಯಕೆ.
- ಜಿ. ಎಸ್. ಶಿವರುದ್ರಪ್ಪ
4 ಕಾಮೆಂಟ್‌ಗಳು:
ಧನ್ಯವಾದಗಳು !!
ನೋಡಿದಿರಾ, ಕೊಟ್ಟ ಮಾತು ಉಳಿಸಿಕೊಂಡಿದ್ದೇನೆ.. ಆದರೆ ಆ ಧನ್ಯವಾದ ನಿಮಗೇ ಸಲ್ಲಬೇಕು.. ಈ ಕವನವನ್ನು ಹುಡುಕುವಂತೆ ಪ್ರೇರೇಪಿಸಿದ್ದು ನೀವೇ ತಾನೇ? :)
ಕನಸು..
ನೀವು ಸಾಹಿತ್ಯವನ್ನ ಹುಡುಕಿ ಮತ್ತು ಅದನ್ನ ನಿಮ್ಮ ಬ್ಲಾಗ್ನಲ್ಲಿ ಪೋಸ್ಟ್ ಮಾಡ್ತೀರಲ್ಲ ನಿಮ್ಮ patience ಗೆ ಒಂದು ಸಲಾಂ :)
ಹಾಗೆ ನೀವು ಓದಿದ ಆ ಪುಸ್ತಕದಲ್ಲಿ ಕವಿತೆಗಳ ರಚನೆಗೆ ಪ್ರೇರಣೆಯಾದ ವಸ್ತು ಅಥವಾ ಸನ್ನಿವೇಶಗಳ ಬಗ್ಗೆ ವಿವರಣೆ ಇದೆಯೇ ?
ಕಾಮೆಂಟ್‌ ಪೋಸ್ಟ್ ಮಾಡಿ