ಎಂಥ ಮರುಳಯ್ಯ ಇದು?

ಎಂಥ ಮರುಳಯ್ಯ ಇದು ಎಂಥಾ ಮರುಳು?

ಬೆಳಗಿನ ಹಿಮದಂತೆ ಹರಿವ ನೆರಳು

ಥಳ ಥಳ ಮಿನುಗಿ

ಸೋಕಲು ಕರಗಿ

ಸರಿವುದು ಈ ಬಾಳಿನೆಲ್ಲ ತಿರುಳು

ಹರಿಯುವ ನದಿಗೆ ಯಾವ ಹೊಣೆ?

ಹಾರುವ ಹಕ್ಕಿಗೆ ಎಲ್ಲಿ ಮನೆ?

ಬಾಳಿನ ಕಡಲಿನ ತೆರೆಗಳ ಸೀಳಿ

ತಲುಪುವುದಾಚೆಯ ದಡದ ಕೊನೆ

ಸಂಜೆಯ ನೇಸರ ಬಣ್ಣದ ಲೀಲೆ

ನೀರಲಿ ಹಾರುತ ಬೆಳ್ಳಕ್ಕಿ ತೇಲೆ

ಕಡಲಿಗೆ ಸಾಲಾಗಿ ಮೂಡುತ ಮುಳುಗುತ

ಬೆನ್ನಟ್ಟಿ ಸಾಗುವ ತೆರೆಗಳ ಹಾಳೆ

ಸೃಷ್ಟಿಯೆ ಸುಂದರ ಸುಳ್ಳಿನ ಮಾಲೆ

                                                           - ಡಾll ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ