ಕವಿ ಬರೆದ

ಕವಿ ಬರೆದ:

ಲೆಕ್ಕಣಿಕೆಯಲ್ಲಿ ತನ್ನ ಎದೆಯನ್ನೇ ಇರಿದಿರಿದು.

ಆಂತರ್ಯ ಸಂಚಯಿತ ಬಾಧೆಯನೆ ಸುರಿದೆರೆದು.

ಬಾಳ ಕುಲುಮೆಗೆ ಸಂದು

ಸದ್ದಿರದೆ ಕಡು ಬೆಂದು

ಬೂದಿಯೊಲುಮೆಗಳ -

ಲೋಕದನ್ಯಾಯಕ್ಕೆ,

ಜಾತಿಮತವರ್ಗಗಳ ನಿಷ್ಕರುಣ ತುಳಿತಕ್ಕೆ

ನುಚ್ಚಾದ ನಲುಮೆಗಳ -

ಹೊಸ ನೆತ್ತರುಕ್ಕಿಂದ ಮೇಲೇರಿ ಬರುವಲ್ಲೆ,

ದಾರಿಗಾಣದೆ ಸುಯ್ದು ನೆಲದಾಳದಲ್ಲೆ

ಹಿಂಜರಿದ ನೂರಾರು ಯೌವನದ ಚಿಲುಮೆಗಳ -

ಮಾಸ, ಮಾಸದವರೆಗು ಭಾರವನು ತಾ ಹೊತ್ತು

ಹಗಲಿರುಳು ಯಾತನೆಯನನುಭವಿಸಿ ಅತ್ತು

ಕವಿ ಹೆತ್ತ ಕವಿತೆಯನು - ಜೀವವನೆ ತೆತ್ತು. 

ತನ್ನ ಕೃತಿ ಕೀಳಲ್ಲ,

ಬಿತ್ತಿದುದು ಬೀಳಲ್ಲ,

ಕಾವ್ಯಕೂ ಮಿಗಿಲಿಲ್ಲ ಕಲೆಯೊಳಗೆ ಎಂದೆನೆಸಿ -

ತನ್ನ ಸೃಷ್ಟಿಯ ಪದರ ಪದರವನೆ ಅಲೆದರಸಿ

ತಳದಾಣಿಮುತ್ತುಗಳ ಎಳೆತರುವ ಭಾವುಕನ

ಬರವನ್ನೆ ತಾ ಕನಸಿ,

ಬರೆದ ಕವಿ

ಲೋಕಾನುಭವಿ.

                                                   - ಕೆ. ಎಸ್. ನಿಸಾರ್ ಅಹಮದ್